شعر شهریار برای همسرش

نه ظریف بیر گلین عزیزه سنی

منه لایق تاری یاراتمیشدی !

بیر ظریف روحه بیر ظریف جسمی

ازدواج قدرتیله قاتمیشدی !!!

عشقیمین بولبولی سنی دوتموش

هرنه دونیاده گول وار ، آتمیشدی

سانکی دوستاق ایکن من آزاددیم

ائله عشقون منی یاهاتمیشدی !

سؤیدوگیم سانکی هم نفس اولالی

قفسیمدن منی چیخارتمیشدی

جنّت ائتمیش منیم جهنّمی می

یانماسین یاخماسین آزاتمیشدی

قاراگون قارقاسی قوناندا منیم

آغ گونوم وارسادا قاراتمیشدی

آدی باتمیش اجل گلنده بیزه

من آییم چیخدی گونده باتمیشدی

سارالیب گون شافاخدا قان چناغین

قورخودان تیتره ییب جالاتمیشدی

قارا بایگوش چالاندا آغ قوشومی

زعفران تک منی ساراتمیشدی

کور قضا ئوز یولون گئدن وقته

چاره نین یوللارین داراتمیشدی

نه قدر اوغدوم آچمادین گؤزیوی

گؤز سکوت ابدله یاتمیشدی

او آلا گؤز اویانمادی کی منیم

بختیمی مین کره اویاتمیشدی

داها کیپریکلرون اولوب نشتر

یارامین کؤزمه سین قاناتمیشدی

سن نه یاخشی ائشیتمدون بالالار

آنا وای ناله سین اوجاتمیشدی

سنی وئردیم بهشت زهرایه

منه مولا الین اوزاتمیشدی

اورگی دوغرانان آنان مه له دی

دونیا زهرین اونا یالاتمیشدی

سن باهار ائتدیگون چمنده خزان

هرنه گول غونچه وار سوزاتمیشدی

نه یامان یئرده کؤچدی کروانیمیز ؟

نه یئیین یوک یاپین دا چاتمیشدی

قیرخا سن یئتمه دون جاوان گئتدون

من گئدیدیم کی یئتدیم آتمیشدی

قوجا وقتیمده بو قارا بختیم

منی قول تک بلایه ساتمیشدی !!!